Eanan- ja meahccedoalloministeriija lea bidjan čielggadanolbmo árvvoštallat boazodoalu dálá dili ja boahtteáiggi hástalusaid.
Čielggadeaddjin bargagoahtá filosofiija doavttir Jukka Bisi, guhte bázii ovddit jagi ealáhahkii Meahciráđđehusa meahcceekonomiijahoavdda virggis.
Ministeriija dieđáhusas muitalit, ahte ulbmilin dainna lea geahčadit boazodoalu doaibmaeavttuid, gánnáhahttivuođa ja bissovašvuođa. Dasa lassin čielggadit boazodoalu gaskavuođa eará eanangeavaheapmái ja servodatlaš ulbmiliidda. Čilgehusas árvvoštallet maiddái doarjja- ja buhtadusvuogádagaid doaibmama sihke boazodoalu ovddidahttinvejolašvuođaid.
– Boazodoallu lea davimus Suoma eallinvuoimmi, kultuvrra ja ealáhusráhkadusa dehálaš oassi. Čilgehusa ulbmilin lea ráhkadit áigeguovdilis oppalašgova boazodoalu dilis ja dan boahtteáiggis dakkár birrasis, mii nuppástuvvá, dadjá eanan- ja meahccedoalloministtar Sari Essayah dieđáhusas.
Eana- ja meahccedoalloministeriija mielde Bisi gullá barggustis viidát boazodoalu iešguđetge oassebeliid, dego eiseválddiid, dutkiid ja eará čanusjoavkkuid. Čielggadeami ulbmilin lea buvttadit analysa boazodoalu stuorámus hástalusain mearrádusaid dahkama doarjjan sihke ávžžuhusaid vejolaš joatkkadoaimmain.
Čielggadeapmi gárvána juovlamánus.
