Suomabeale Sámis leat suoidnemánu áigge geargan mearkumiin. Sámebálgosiin miessedilli orru dán gease buorre, vaikko diimmá báhkka geassi čuohcá dán jahkái.
Mannan gease guhkes báhkat ja goikkádat dagahedje dan, ahte eandalit miesit gillájedje. Maiddái áldduin lei heajos dilli ja dat čuozai maiddái dán giđa guoddimii. Sihke álddut ja varrásat eai lean nu vuimmiid alde ragatáiggis mannan čavčča, mii vuhtto dál muhtin sámebálgosiin.
Dál liikká go veardida diimmážii, bálgosiid ovddasteaddjit lohket dán geasi leamašan olu buoret bohccuide.
Neakkela bálgosa boazoisit Hannu Ranta mielas čoaskásut dálkkit leat buorit.
- Gal mu mielas lea buorre, ahte ii leamašan seamma báhkas go diibmá. Livččii vuogas, jus ii šattaše nu báhkka ahte buot goiká, lohká Ranta.
Čoaskkes geassi álkidahtii mearkuma
Miehtá sámeguovllu lei iešguđetlágan dilli čohkkemiid dáfus muhto loahpaloahpas čohkken ja mearkumat manne bures. Dálkkit váikkuhit olu bohcco láhttemii, muhto maiddái dasa mo daiguin galggašii johtit ja doaibmat.
Boazodoalli Juha West Bátneduoddaris ii duššiid hohpohala, dasgo čohkkema álggus lea dušše vuordit bohccuid boahtit ieža sivlláid sisa.
- Ii dárbbaš eará go rahpat verráha ja vuordit. Čohkkemis ii mana guhkká ja miesit mearridit makkár leavttuin ovdánit. Gulul johttit ja muhtumin ferte veháš vuorddašit, muitala West.
Muotkeduoddara boazoisit Janne Kitti muitala, ahte miesit ledje gievrrat ja stuorrát árra giđa dihte.
- Mearkumat manne giehtačállosa mielde, dálkkit stivrejedje bohccuid justa dego galggaige. Lei álki, iige mannan guhká, rámiida Kitti.
Spiredilli čáskada vuordámušaid čavčča miesseproseanttas
Vaikko miesit orroge aiddo dál leamašan bures, de dilli ii leat sihkkar ja sáhttá nuppástuvvat ovdal čavčča bigálusaid.
Mearragoaskkimat leat Giehtaruohttasa várreboazoisit Nils-Jonas Ketola misiid vearrámus vašálaččat. Sámeguovllu nuppe bealde Avvila bálgosis fas guovžžat goddet ja čihket miesážiid, muitala Avvila boazoisit Niko Kustula.
Buorre miesseproseantta lassin bálgosiid ovddasteddjiid oktasaš sávaldat loahppageassái leat valjis guobbarat.
Yle Sápmi ii fáhten Sállevári ja Lappi bálgosiid ovddasteddjiid.
