Dán vahkkoloahpa čoahkkanit vuot olbmot viehkat ja sihkkelasttit Gálddooaivve guvlui. Gálddooaivvi Ultra Trail -gilvvus leat iešguđet guhkkosaš mátkkit, maid sáhttá viehkat dahje duolbmat sihkkeliin.
Sirpmálaš, 62-jahkásaš Agnar Øystein Varsi lea searvan daidda gilvvuide jo máŋgii. Son lea viehkan juohke jagi eará guhkkosaš mátkki - son lea viehkan jo 18 kilomehtera, golbma miilla ja 57 kilomehtera, vel sus lea 168 kilomehtera mátki viegakeahttá.
– Dat leat dat guhkimus. Dasa mun goit galggan hárjehallat vel moadde jagi ovdal dien beasan geahččalit, dadjá Varsi.
Dál son áigu viehkat vuot 18 kilomehtera. Diimmá gilvvuin son galggai viehkat golmma miilla mátkki, muhto loahpaloahpas dat šattaige guhtta miilla. Dat ii liikká orron nu issoras, go lei jo ovddit jagi viehkan 57 kilomehtera.
– Mun čuvvon guovtti láttána, eat mii fuomášan gokko geaidnu manai ja de šaddenge guhtta miilla viehkat. Aistton meahccái dat manai, muhto mun čađahin dan. Dien guoktá vižže njealjejuvllagiin, boagusta son.
Gálddooaivvi Ultra Trail lea sutnje dego ruoktogilvu.
– Mii leat jo mánnávuođa rájes johtán dán guovllus. Gálddooaivvi Ultra Trailis eanaš mátkkit vulget Skállovári bigálusáidde luhtte, ja dakkár ii gávdno eará sajis máilmmis. Livččii vel juollut okta juoigi, gii juoiggašii go mii vuolgit, jurddaša son.
Buoremus vuohki hárjehallat lea lossa luomeseahkka sealggis
Varsi ii leat goit dábálaš astoáiggeviehkki, son baicca lea hárjánan maratonaid viehkat. Son áigu searvat dán jagi maid viehkangilvui Københámmanis, Dánmárkkus gos galgá viehkat viđa kilomehter mátkki.
– Dat leat máilmmimeašttirgilvvut, vihtta kilomehtera viehkat geaidnoráigge. Dat ii leat nu guhkki, de dasa ferte hárjehallat oanehaš mátkki ja leavttu.
Vaikke son leage jo dego ámmátvaláštalli, sus ii leat sierra hárjeheaddji geainna ráhkada hárjehallanprográmma. Son liiko viehkat meahcis ja dál geassit ovdamearkka dihte luomejeakkis.
– Buoremus hárjehallanvuohki lea, go viehkala meahccái. Ja go luomeseahkka dievvá, de lea dehkiide buorre lossa lávkkain vázzit dahje viehkat. Dat lea buot buoremus, cavgila Agnar Varsi.
Divvojuvvon 24.7.2026 dii 12.34: Gálddooaivvi Ultra Trailis guhkimus viehkanmátki lea 168 kilomehtera, ii 130 dahje 180 kilomehtera nu mo vuos muitaleimmet.
