K-pop

K-pop-bando MBLAQ

K-pop (abreviuro di Koreana pop) esas jenro de populara muziko originale de Sud-Korea.

Dum ke la moderna formo de K-pop devenas de la frua 1990a yari, la termino ipsa populareskis depos la 2000a yari, remplasinta la termino Gayo, qua anke referas pop-muziko en Sud-Korea.

Malgre ke ol generale indikas "populara muziko" en Sud-Korea, la termino ofte uzesas plu streta-sence por deskriptar moderna formo de Sud-Koreana pop qua influesas da stili e jenri de cirkum la mondo, quala muziko experimental, rock, jazo, gospel, hip hop, R&B, reggae, elektronikala dance, folk, country, e klasika muziko, ultre sua tradicionala koreana muzikala radiki.

La plu moderna formo del jenro emersis per la formaceso di un ek la unesma K-pop-grupi, Seo Taiji and Boys, en 1992.  Lia experimento per diferanta stili e jenri de muziko ed integrigo di stranjera muzikal elementi helpis riformizar e modernigar la nuntempa muziko-ceno di Sud-Korea.

La "idolo"-kulturo di moderna K-pop komencis per la yunulo-bando H.O.T. en 1996, kande K-pop kreskis aden subkulturo qua atraktis enorma fanatikari de adolecanti e yuna adulti.  Pos despopularesko di frua K-pop, depos 2003 la duo TVXQ e la kantistino BoA startis nova generaciono de K-pop-idoli qui exportacis la muziko-jenro aden la vicina japoniana merkato e dure popularigas K-pop internacione hodie.

Per l'adveno di enreta sociala reto-servi e koreana TV-programi, la nuna difuzeso di K-pop e koreana amuzo, konocata kom la Koreana Ondo, esas videbla ne nur en Est-Azia e Sudest-Azia, ma anke en Pakistan, Bangladesh, India, Latin-Amerika, Nord-Afrika, Sudala Afrika, la Proxima Oriento e tra la Westana mondo, ganinta vasta global audantaro.

Suocidi

Kontrastante la gaya kansoni e dansi dal artisti di K-pop, la vivo dil artisti esas harda pro la senkompata muzik-industrio. Artisti kontinue devas esar pronta por la sociala komunikilaro, jurnalaro e televiziono. Por ne domajar la perfekt imajo dil artisti, ne esas permisita sexuagar ante od exter la mariajo. Postulesas perfekt aspekto (severa dieti, plastica kirurgio), perfekta konduto, perfekt karaktero. La presuro duktis a suocidi inter diversa K-pop-artisti.