Revolver

Revolver
музычны альбом The Beatles
Дата выпуску	5 жніўня 1966
Жанр	рок-музыка, рок-н-рол, псіхадэлічны рок і прагрэсіўны рок
Працягласць	2 080 с

«Revolver» — сёмы студыйны альбом рок-гурта «The Beatles», выпушчаны 5 жніўня 1966 года. У храналогіі амерыканскіх выданняў, якія рыхтуюцца кампаніяй Capitol Records, Revolver быў адзінаццатай кружэлкай гурта, выдадзенай у ЗША 8 жніўня 1966 года. У амерыканскае выданне не ўвайшлі песні «I’m Only Sleeping», «And Your Bird Can Sing» і «Dr. Robert», ужо выпушчаныя 20 чэрвеня 1966 года ў альбоме Yesterday and Today. Адначасова з кружэлкай Revolver у продаж паступіў сінгл «Yellow Submarine» / «Eleanor Rigby».

Гурт распачаў студыйную працу 6 красавіка, пачаўшы з запісу песні «Tomorrow Never Knows». Апошняй для альбома Revolver была створана «She Said, She Said». Усе кампазіцыі запісваліся ў студыі Эбі-Роўд у Лондане. Музычным прадзюсарам і гукарэжысёрам, як і ў папярэдніх работах The Beatles, быў Джордж Марцін, а новым гукааператарам стаў Джэф Эмерык. Да запісу некалькіх песень былі прыцягнуты пабочныя музыканты: струнны ансамбль для музычнага суправаджэння «Eleanor Rigby»; Аніл Бхагват, які сыграў на барабанах табла для песні «Love You To»; валтарніст Алан Сівіл, які прыняў удзел у запісе «For No One»; трое трубачоў і двое саксафаністаў для выканання партыі духавых інструментаў у песні «Got to Get You into My Life».

Неўзабаве пасля жнівеньскага рэлізу ў 1966 годзе альбом узначаліў хіт-парады і ўтрымліваў першую пазіцыю на працягу сямі тыдняў у Вялікабрытаніі і на працягу шасці тыдняў у ЗША. Крытыкамі было адзначана наватарства The Beatles: новыя метады гуказапісу, эксперыменты з музычнымі стылямі, пашырэнне тэматыкі тэкстаў песень. Revolver з прыкметным пастаянствам залічваўся ў розныя спісы лепшых запісаў ХХ стагоддзя, зазнаў мноства перавыданняў, на песні з гэтага альбома створана больш за 270 кавер-версій. Паводле Амерыканскай асацыяцыі кампаній гуказапісу альбом неаднаразова сертыфікаваны як мультыплацінавы.

Спіс кампазіцый

Бок А
№	Назва	Lead vocals	Працягласць
1.	«Taxman» (*)	Harrison	2:36
2.	«Eleanor Rigby»	McCartney	2:11
3.	«I'm Only Sleeping»	Lennon	2:58
4.	«Love You To» (*)	Harrison	3:00
5.	«Here, There and Everywhere»	McCartney	2:29
6.	«Yellow Submarine»	Starr	2:40
7.	«She Said She Said»	Lennon	2:39
18:33

Бок В
№	Назва	Lead vocals	Працягласць
1.	«Good Day Sunshine»	McCartney	2:08
2.	«And Your Bird Can Sing»	Lennon	2:02
3.	«For No One»	McCartney	2:03
4.	«Doctor Robert»	Lennon	2:14
5.	«I Want to Tell You» (*)	Harrison	2:30
6.	«Got to Get You into My Life»	McCartney	2:31
7.	«Tomorrow Never Knows»	Lennon	3:00
16:28

Спасылкі

• Revolver на сайце Last.fm
• Revolver на сайце Discogs^*
• Revolver^* — інфармацыя пра альбом у "Бібліі The Beatles"
• Тэксты песень альбома Revolver
• Как «Револьвер» вышиб мозги американской молодежи // Взгляд, 5 жніўня 2021

• На Вікісховішчы ёсць медыяфайлы па тэме Revolver