Televizija

Televizijne prijemniky s ploskym ekranom na izstavě na prodaž v magazinu potrebiteljskoj elektroniky v 2008 godu

Televizija (TV) (od ang.: TV — televizija, čitaje se «ti vi», od davnogreč.: τῆλε «daleko» + lat.: visio «viděti») jest telekomunikacijno srědstvo dlja prědavańja dvižučih se obrazov i zvuka. Dodatočno, termin može odnositi se do fizičnogo televizora a ne do srědstva prědavańja. Televizija jest masovo srědstvo dlja reklam, veseljańja, novin i sporta. Srědstvo jest sposobno na veče než "radioprědavańje", ktore odnosi se do zvučnogo signala poslanogo do radioprijemnikov.

Televizija stala dostupnoju v surovih eksperimentalnyh formah v 1920-yh lětah, ale toliko poslě nekoliko lět daljšego razvitja nova tehnologija byla dostavjena na trg potrebiteljam. Poslě Vtoroj světovoj vojny, ulěpšena forma črno-bělogo televizijnogo prědavańja stala popularnoju v Sjedinjenom Kraljevstvě i Sjedinjenyh Štatah, a televizory stali se običajnymi v domah, predprijatijah i institucijah. V tečeńju 1950-yh lět, televizija byla glavnym srědstvom dlja vplivańja na publično mněńje. V srědině 1960-yh lět, cvětne prědavańje bylo vvedeno v SŠA i večinstvě inyh razvityh krajin.

Dostupnost različnyh tipov arhivnyh srědstv shranjeńja, takyh kako lenty Betamax i VHS, lazerne disky, tvrde disky visokoj kapacitety, Video CD, DVD, fleš-disky, Blu-ray disky visokoj rezolucije i digitalne videorekordery, jest dozvolila zriteljam gledati prědnje zapisany material — taky kako filmy — doma po jih sobstvenom časovom raspisu. Iz mnogyh pričin, osobno udobnosti zdaljenogo dostupa, shranjeńje televizijnyh i video programov tutčas takože odbyvaje se v oblaku (tako kako služba video-na-žedańje od Netflix). Na početku 2010-yh lět, prědavańja digitalnoj televizije znakovito uveličili se v popularnosti. Inym razvitjem byl prěhod od televizije standardnoj rezolucije (SDTV) (576i, s 576 prepletenymi linijami rezolucije i 480i) do televizije visokoj rezolucije (HDTV), ktora obezpečaje rezoluciju, ktora jest sučšestveno vyša. HDTV može byti prědavana v različnyh formatah: 1080p, 1080i i 720p. Od 2010 goda, s iznajdeńjem pametnoj televizije, internetna televizija jest uveličila dostupnost televizijnyh programov i filmov črěz Internet posrědstvom služb potočnogo videa, takyh kako Netflix, Amazon Prime Video, iPlayer i Hulu.

Iztočniky

• Tutoj članok imaje prěvod iz članka «Television» v Vikipediji na anglijskom (spis avtorov; dozvoljen‌je CC BY-SA 4.0).