Anibal

Monument di marmul di om , ritignût il comandant Anibal , cjatât a Capua

Anibal Barca (par punic: 𐤇𐤍𐤁𐤏𐤋𐤟𐤁𐤓𐤒, Ḥnb'l Brq; Cartagjin, 247 a.C. – Libissa, Bitinie, 183 a.C. cirche) al fo un gjenerâl e om politic cartagjinês, considerât un dai plui grancj condotîrs e strategics militârs de storie antighe. Al fo il principâl aversari de Republiche romane te Seconde vuere puniche.

Fi dal innomenât comandant Amilcar Barca, Anibal al cres cu la asse par Rome. La sô plui cognossude imprese militâr e fo la traviersade des Alps intal 218 a.C. cuntun esèrcit che al comprindeve ancje i famôs elefants di vuere, par invadi l'Italie diretamentri dal nord. In tal cors de sô campagne al otèn vitoriis straordinariis cuintri i Romans, come tes batais de Trebia, dal Lâc Trasimên e massime a Canne, considerade une opare mestre di tatiche militâr.

Daspò di vê mantignût l'esercit in tal sud de Italie par plui di sedis agns cence jessi mai stât vinçût in cjamp viert, Anibal al fo obleât a tornâ in Afriche, dulà che al fo sconfit de strategjie di Scipion l'African te Bataie di Zama in tal 202 a.C..

La vite

Zoventût e il zuarament cuintri Rome

Claudio Francesco Beaumont, Anibal al zure cuintri i Romans (ueli su tele, 330 × 630 cm dal XVIII secul)

Anibal al jere fî di Amilcar Barca, il gjenerâl cartagjinês che al veve comandât lis fuarcis te Prime vuere puniche. Al veve ancje doi fradis, Asdrubal e Magon, e doi cugnâts, ancje lôr comandants militârs.

Cora che Anibal al veve dome nûf agns, so pari al decît di puartâlu cun lui te Spagne (la Iberie), dulà che Cartagjin e steve fasint gnovis concuistis par compensâ la piardite de Sicilie e de Sardegne. Prime di partî, Amilcar i fâs zurâ al zovin Anibal, in tun altâr di sacrifizi, che no al sarès mai stât amî di Rome.

Daspò la muart di Amilcar in tal 228 a.C. e de sô cugnât Asdrubal il Just in tal 221 a.C., Anibal al fo proclamât comandant supremi dal esèrcit cartagjinês in Spagne a dome vincjecuatri agns.

Il scomenç de Seconde vuere puniche

Francisco Domingo Marques - I ultins dîs di Sagunto (1869)

In tal 219 a.C., Anibal tache la çitât di Sagunto, un aleât di Rome in tal est de Spagne. Daspò un assedi di vot mès, Sagunto cole. Cheste azion e provoche la reazion dal Senât roman, che al declare  la vuere a Cartagjin in tal 218 a.C., marcjant il principi de Seconde vuere puniche.

Le citât di Qart Hadasht , le Gnove Cartagjine

In tal mès di mai dal 218 a.C., Anibal al partîs di Cartagjin Nova (vuê Cartagena) cuntun esèrcit imponent di cirche 90.000 oms di fanterie, 12.000 cjavalîrs e 37 elefants. Al traversè i Pireneus e al superè il flum Rodano, rivant a evitâ i contingjents romans che a cirivin di fermâlu.

La traviarsade des Alps

Le traviersade des Alps de bande di Anibal cn il sô esercît e i elefants. Tal sô cjamin , al cjatarâ popolazions iberichis e celtichis.

Une des impresis plui audazis de storie militâr e fo la traversade des Alps de bande di Anibal in tal autun dal 218 a.C.. Malgrât il frêt strem, la nêf, i atacs des tribus gjalichis locâls e la dificoltât dal terren, Anibal al rive in te Planure Padane.

La traversade e coste une piardite imponente di oms e anemâi: al rivà in Italie cun dome 20.000 oms di fanterie, 6.000 cjavalîrs e une piçule part dai elefants. In dutis manieris, la sô rivade al cjape i Romans impreparâts e ipermèt di cjapâ de sô bande varis tribùs di Gjals dal Nord Italie, discontents dal domini roman.

Lis grandis vitories te Italie (218–216 a.C.)

Inntal cors dai primis agns di cjampagne te penisule taliane, Anibal al sbaraze i esèrcits romans in cuatri batais memorabilis:

• Bataie dal Ticino (218 a.C.): Piçul scuintri di cjavalerie dulà che il consul Publio Cornelio Scipione (pari dal futûr African) al fo ferît.

• Bataie de Trebia (218 a.C.): Anibal al sdrume l'esèrcit dal consul Tiberio Sempronio Longo par mieç di une imboscade puestade te nêf e te glace.

• Bataie dal Lâc Trasimên (217 a.C.): Anibal al atire l'esèrcit dal consul Gaio Flaminio in tune streture jenfri  lis colinis e il lâc, anientant scuasit 30.000 soldâts romans.

Anibal vincidôr te Bataie di Canne (stampe dal XIX secul)

• Bataie di Cannas (216 a.C.): Considerade la so opare mestre a nivel tatîc. A Canne, te Pulie, Anibal cun un esèrcit inferiôr numericamenti al doprè la tatiche  dal dopli incerclament par distruzi un esèrcit roman di plui di 80.000 oms comandâts dai consols Lucio Emilio Paolo e Gaio Terenzio Varrone. Plui di 50.000 Romans muerin in une sole zornade.

La strategjie dal logorament

Anibal al rive a tignî cjâf al Tardatôr e a no dâ il numar reâl de sôs fuarcis militârs mitint torcis piadis tai cuars des bestis dal sô esercît

Daspò la sbaracade di Canne, diviersis çitâts dal Sud Italie, comprindude Capua, a passin de  bande di Anibal. In dutis manieris, Rome no si rint. Il ditadôr roman Quinto Fabio Massimo (clamât Cunctator, il "Tardadôr") al adote une strategjie di logorament,schindant  lis batais cjamp viert e tajand i riforniments al esèrcit cartagjinês.

Zuan Batiste Tiepolo - Anibal al cjale il cjâf tajât di sô fradi Asdrubal , copât dai Romans (1725-1730)., Viene, Kunsthistorisches Museum)

Anibal no veve i mieçs di assedi suficents par cjapâ Rome e no ricêf jutoris adeguâts de bande di  Cartagjin. Cundùt di chel, al rive a mantegni il contrôl militâr tal sud de Italie par plui di dîs agns, rivant a vincit altris scuintris minôrs, ma cence podê dâ un colps decisîf. Daspò che so fradi Asdrubal al fo vinçût e copât te Bataie dal Metauro (207 a.C.) intant che al puartave rinfuarç, lis pussibilitâts di Anibal a svanissìn.

Il tornâ in Africa e la Bataie di Zama

l'at finâl de Segonde Vuere Puniche (202 p.d.C)

In tal 204 a.C., il zovin e talentôs gjenerâl roman Publio Cornelio Scipione (futûr Scipion l'African) al sbarcje in Afriche par tacâ diretamendri Cartagjin. Il Senât cartagjinês al ordene a Anibal di bandonâ l'Italie par tornâ a difindi la patrie in tal 203 a.C..

Il scuintri finâl e fo la Bataie di Zama intal 202 a.C.. Scipion al adote tatichis une vore dongje a chês di Anibal e al dopre la cjavalerie numide cuintri di lui. Par la prime volte te sô vite, Anibal al fo viçût in cjamp viert. Cartagjin e fo obleade a fâ la pâs a condizions durissimis, pierdint la sô flote, i siei teritoris oltremar e la sô independence di politiche estere.

Post-vuere, esili e muart

I trois cjapâts da Anibal cun dute probabilitât par rivâ in Italie

Daspò la sconfite, Anibal al dimostrè il sô talent di om politìc. Clamât al guviar di Cartagjin come ‘‘sufet’’ (magistrât d'alt nivel), al introdûs riformis democratichis e economichis par pajâ lis indemnizazions di vuere imponudis di Rome e re-inviâ la economie citadine.

Temût dai Romans e tradît di une fazion de nobiltât cartagjinês rivâl, in tal 195 a.C. Anibal al fo obleât al esil iin Orient ,sòt de protezion  de cort dal re Antioco III dal Imperi Seleucidi, e daspò in te cort dal re Prusia I di Bitinie.

Cuant che i Romans a sburtìn Prusia a consegnâlu, Anibal al decît di no colâ vîf tes mans dal nemî. In tal 183 a.C. (o 181 a.C.), a Libissa (vuê Gebze, in Turchie), al mûr , velenât par sô volontât. La tradizion e dîs che lis sôs ultimis peraulis a forin: "Liberin i Romans di chest afàn, viodût che no puedin spietâ la muart di un vieli".

Ereditât e geni militâr

Anibal al è considerât un dai plui grandis strategics di ducj i temps, aprezât di condotîrs dal nivel di Juli Cesar e Napoleon Bonaparte. La sô capacitât di cjatâ i ponts  debui dal nemî, il terèn e la psicologjie dai comandants aversarîs e restâ un esempli fondamentâl te storie militâr.

La sô manovre di incerclament a Canne e je studiade fin a vuê tes academis militârs di dut il mont come il model ideâl di  tatiche.

Bibliografie

• Tito Livio, Ab Urbe Condita (libris XXI-XXX).
• Polibio, Storie (libris III, VII, XV).
• Giovanni Brizzi, Annibale, Il Mulino, Bologna, 2014.
• Adrian Goldsworthy, The Fall of Carthage: The Punic Wars 265–146 BC, Cassell, 2003.
• Serge Lancel, Hannibal, Fayard, Paris, 1995.

Leams esternis

• Anibal te Encyclopædia Britannica (par inglês).
• Anibal te Enciclopedia Treccani (par talian).
• Profile di Anibal te World History Encyclopedia (par inglês).