Ultravioleta

Lampa fluorescent de luz ultravioleta. A radiación ultravioleta no ye visible; manimenos, muitas d'as lampas ultravioletas emiten marguinalment parti d'a suya luz en a zona adchacent d'espectro visible, por lo que se veyen d'una color violeta.

L'ultravioleta, radiación ultravioleta u luz ultravioleta (UV) ye a radiación electromagnetica con una longaria d'onda menor a la luz visible y mayor a la d'os rayos X. A suya longaria d'onda va alto u baixo dende os 400 nanometros dica os 15 nanometros y presenta enerchías d'entre 3 y 124 eV. O nombre significa "dillá d'o violeta" (d'o latín ultra), o violeta ye a color visible con a longaria d'onda mas curta y la d'a radiación ultravioleta ye encara mas curta.

A radiación ultravioleta se troba en as radiacions solars y tamién ye emesa por os arcos electricos y por bels tipos de lampas que producen luz negra. Ya que se tracta d'una radiación ionizant puet prevocar reaccions quimicas y a fluorescencia de ciertas sustancias. Iste tipo de radiación ye nocivo ta la salut, prevoca o bronceyato pero tamién pueden causar cáncers cutanios como lo melanoma, o aviellimiento prematuro d'a piel (corrucas), cremazos, cataractas, etcetera.

Referencias

• Datos: Q11391
• Multimedia: Ultraviolet light / Q11391