Shablono:Eventi
dum mayo
50, 100 e 200 yari ante nun …
4 di mayo 1976. La diala jurnalo El País ("La Lando") fondesis en Madrid, Hispania, sis monati pos la morto di Francisco Franco, dum periodo di transito a demokratio en Hispania. En la unesma yaro la jurnalo diale vendis 116.600 kopiuri; en 2018, la diala vendo esis 138.000 kopiuri. En 1989, El País kunlaboris kun La Repubblica en Italia e Le Monde en Francia, pri krear komuna reto di fonti por informesi. Depos 2001, versiono di El País en la Angla linguo inkluzesas en la Hispana versiono di la International Herald Tribune. El País esas egardata, kun El Mundo ed ABC, kom autoritativa e ne-dependanta jurnalo en Hispania.
12 di mayo 1926. Umberto Nobile flugis super la nordala polo en sua aero-navo Norge. La navo portis Roald Amundsen, qua plu frue en la vivo duktabis sucesoza expediciono per pedo a la sudala polo. Amundsen invitabis Nobile, qua dum plura yari konstruktabis e developabis direktebla aero-navi en Italia, konstruktar navo por flugo super la nordala polo. Ye 11 di mayo la Norge departis de Svalbard, e la voyajo finis pos du dii ye Teller en Alaska. En 1928 Nobile, sen Amundsen, duktis plusa flugo super la polo en la aero-navo Italia; ol aplastesis, ed Amundsen mortis kande aeroplano, qua esis parto di la sokurso-misiono, desaparis.
3 di mayo 1826. Karl la 15ma, rejulo di Suedia e Norvegia, naskis en Stockholm; il esis la unesma Sueda monarko naskinta en ta lando. Ye 3 di mayo 1860 il esis kronizata en Stockholm, Suedia, e ye 5 di agosto di ta yaro il esis kronozata en Trondheim, Norvegia. Ilua spozino, a qua il esis mariajata en 1850, esis Louise, filiino di Willem la 2ma di Nederlando. Preferante altra homini, il havis plura amoratini, inkluzanta Elise Hwasser, qua esis notenda Sueda aktorino. La regno di Karl esis sucesoza; dum la regno esis importanta reformi di ekleziala e kriminala lego. Ilua moto esis: Land skall med lag byggas ("La lando konstruktesos per lego").
