Severní
| ||
| Zakładne daty | ||
|---|---|---|
| stat |  Čěska | |
| kraj |  Wusće | |
| wysokosć | 360 metrow n.m.hł. | |
| přestrjeń | 8,05 km² | |
| wobydlerstwo | 43 (2021) | |
| hustosć zasydlenja | 0,1 wob./km² | |
| póstowe čisło | 40784 | |
 | ||
| Domy w Severní | ||
Severní (němsce Hilgersdorf) je najsewjerniša wjes w Čěskej, gmejnski dźěl Lobendawy w Šluknovskim wuběžku. Leža w Děčínskim wokrjesu Wusčanskeho kraja.
Mjeno
[wobdźěłać | žórłowy tekst wobdźěłać]Němske mjeno Hilgersdorf pochadźa z muskeho předmjena Hilger (w druhich wariantach tež Hiltger, Hiltiger abo Hildiger) a substantiwa Dorf (wjes). W přełožku rěka potajkim serbsce Hilgerowa wjes. Čěske pomjenowanje Severní je nowotwórba stworjena po Druhej swětowej wójnje.[1]
Stawizny
[wobdźěłać | žórłowy tekst wobdźěłać]Wjes bu drje w druhej połojcy 13. lětstotka załožena. Prěnje pisomne naspomnjenje wo njej pochadźa hakle z lěta 1472. W lěće 1877 załoži so tule dobrowólna wohnjowa wobora. Po kóncu Druheje swětoweje wójny wuhna so wjetšina domoródnych němskich wobydlerjow. W lěće 1950 přizamkny so Severní gmejnje Lobendawa. W 1950tych lětach su wjetšinu (štyri pjećiny) domow spotorhali.
Přirodne poměry
[wobdźěłać | žórłowy tekst wobdźěłać]
Cyłkowa přestrjeń katastralneho teritorija Severní je 804,7232 hektarow.[2] Na juhu mjezuje Severní z Lobendawu, na wuchodźe z gmejnu Lipová (gmejnskej dźělej Lipová a Liščí), na sewjerowuchodźe ze saksku gmejnu Wołbramecy a na sewjeru hač do zapada z Nowym Městom w Sakskej (měšćanski dźěl Berthelsdorf).
Cyła wjes słuša k Łužiskim horam. Najwyši dypk wsy je Buková hora (512 m), na kotrejež skłoninje leži při mězniku 2/41 najsewjerniši dypk Čěskeje. Dalšej wuznamnej hórce stej Smrkový vrch (472 m) a Stráž (460 m).[3][4]
Přewažowaca kamjenizna je dwubłyšćinkaty granodiorit, w kotrymž namaka so wjele doleritowych žiłkow. Dolerit wudobywaše so w dawno hižo zawrjenej wulkej skale na skłoninje Bukoweje hory. Na sewjeru teritorija wsy namaka so tež łužiski granodiorit.[5] Najbóle rozšěrjeny typ pódy je bruna póda.[6]
Wjes wupřestrěwa so podłu rěčkow Severní potok a po tym Luční potok. Severní potok wuliwa so do Lučneho potoka w južnym dźělu wsy. Wjes słuša k přitočnišću Łobja a tuž Sewjerneho morja. Lěsy při statnej hranicy płaća tradicionelnje jako wobstatk lěsneje kónčiny Hohwald.
Wobchad
[wobdźěłać | žórłowy tekst wobdźěłać]
Přez južnu kromu katastralneho teritorija wjedźe dróha III/2671, kotraž zwjazuje Lobendawu a Lipovu přez wjeski Severní a Liščí. Z njeje wotboči dróha III/2677, kotraž přez srjedźišćo wsy běži a skónči na sewjernej kromje wsy. Dróha wjedźe dale jako puć za kolesowarjow a turistow k hraničnemu přechodej Severní–Wołbramecy. We wsy namakatej so na liniji 512410 dwě busowej zastanišći Lobendava, Severní a Lobendava, Severní, Zátiší.
Zajimawosće
[wobdźěłać | žórłowy tekst wobdźěłać]- najsewjerniši dypk Čěskeje
- něhdyši wódny młyn (Hilgersdorfski młyn), dom čo. 54
- chěža ze stołom čo. 166
- chěža ze stołom čo. 167 (něhdyši blidarstwo)
- wopomnjenski štom Sudniska lipa
- statua knježny Marije z lěta 1896
- pomnik woporam Prěnjeje swětoweje wójny
- najsewjerniši zjawny knižny kamor Čěskeje
- wottorhana kapałka Jandźela Stražnika z lěta 1869
Žórła
[wobdźěłać | žórłowy tekst wobdźěłać]- ↑ Antonín Profous: Místní jména v Čechách. 1 nakład. Česká akademie věd a umění, Praha 1947, hesło Hilgersdorf, str. 552 (čěsce).
- ↑ k.ú.: 686280 - Severní - podrobné informace (čěsce) Český úřad zeměměřický a katastrální. Wotwołane dnja 21. septembra 2025.
- ↑ Základní topografická mapa ČR 1 : 25 000 (čěsce) Český úřad zeměměřický a katastrální. Wotwołane dnja 21. septembra 2025.
- ↑ Mapy.com: turistická mapa (čěsce) Mapy.com. Wotwołane dnja 21. septembra 2025.
- ↑ Geologická mapa 1 : 25 000 (čěsce) Česká geologická služba. Wotwołane dnja 23. septembra 2025.
- ↑ Půdní mapa 1 : 50 000 (čěsce) Česká geologická služba. Wotwołane dnja 23. septembra 2025.
