Seta
- Ta atros usos d'o termin se veiga Seta (desambigación)
Una seta[1], fonga[1], fongueta[1], camparol[1] u peperón[1] ye como se conoixe a o cuerpo fructifero de bellas especies de fongos. Solen creixer en puestos pocins, debaixo d'os árbols pero tamién en belaltros puestos a on que no i haiga guaire luz y a humedat siga considerable. Bellas especies d'ixes fongos os fan comestibles, altras son verenosas, y encara prou bi n'ha que pueden causar efectos psicoactivos.
Anque no son cautivatas en garra huerta, as setas se clasifican a dintro d'as hortalizas dende lo punto d'enviesta d'o suyo uso nutricional. En son eixemplos comestibles o robellón (Lactarius deliciosus), o sampinyón (Agaricus spp.), o muixardón (Calocybe gambosa), as muixardinas (Marasmius spp.) u cualques especies de cocomas (chenero Lepiota).
As diferents denominacions ta istes cuerpos fructiferos tienen oríchens diferents, y se sienten a sobén en comarcas u redoladas que no coinciden. O termin «bulet» (d'o latín boletus) pareix que ye una denominación conoixida en Cinco Villas, en l'extremo occidental d'Aragón. A parola «camparol» puede dimanar d'o pareixiu d'entre a corona y os chambreros de palla que enantes s'emplegaba ta as fayenas de campo (camparol, en aragonés, ye a persona que treballa en o campo), y «potrecón», que se diz en Sobrarbe, pareix que fa clara referencia a la putrefacción, que en en materials como a madera bellas vegadas s'acompanya con l'aparición d'istes organismos.
Evolución
[editar | modificar o codigo]As setas s'orichinoron de floriduras dimpués d'a fusión de dos micelios monocarioticos, d'a que surche lo micelio dicariotico formador de cuerpos fructiferos. Probablement amaneixioron dimpués d'a explosión cambrica fa 530 millons d'anyos. Os fósils mas antigos de setas datan d'o periodo Devoniano.[2]
Clasificación
[editar | modificar o codigo]As setas tipicas son os cuerpos fructiferos d'os miembros de l'orden d'os Agaricales. O suyo chenero tipo ye Agaricus y la suya especie tipo ye la seta dita muixardón de rastro, Agaricus campestris. Manimenos, en as clasificacions modernas definidas molecularment, no toz os miembros de l'orden Agaricales producen cuerpos fructiferos de setas tipicas, y muitas atras setas tipicas con laminas se troban en atros órdens d'a clase Agaricomycetes. Por eixemplo, os fongos gasteroides son en os órdens Cantharellales y Gomphales, os champinyons leitosos (Lactarius, Lactifluus) y as loras (Russula y Lentinellus) son en l'orden Russulales, mientres que los cheneros duros y coriacios Lentinus y Panus son entre los Polyporales, pero Neolentinus ye en l'orden Gloeophyllales, y lo chicot chenero de setas Rickenella, chunto con cheneros semellants, son en l'orden Hymenochaetales. Dentro d'o cuerpo prencipal d'os Agaricales se troban setas comuns tals como: muixaridinas, shiitake, enokis, chirigolas orelludas, fongo res, apagacandils, etc.[3][4]
Atras setas no tienen laminas, conque lo vocablo «seta» se fa servir librement y ye difícil de dar una descripción completa d'as suyas clasificacions. O termin ye mas una aplicación comuna a los cuerpos fructiferos de fongos macroscopicos que un termin con una taxonomía precisa. Se describen aproximadament 14.000 especies de setas.
Se veiga tamién
[editar | modificar o codigo]Referencias
[editar | modificar o codigo]- 1 2 3 4 5 (an) Diccionario aragonés-castellano-catalán. Estudio de Filología Aragonesa. Edacar num. 14. Zaragoza. Edicions Dichitals de l'Academia de l'Aragonés. ISSN 1988-8139. Octubre de 2024 (accesible vía web).
- ↑ (en) Perithecial ascomycetes from the 400 million year old Rhynie chert: an example of ancestral polymorphism, en Mycologia, vol.97, 1 p.269–285, 2005.
- ↑ (en) .
- ↑ (en)[url=http://botit.botany.wisc.edu/toms_fungi/aug2001.html].
Vinclos externos
[editar | modificar o codigo]
| Control d'autoridaz |
|
|---|
